ខេត្តបាត់ដំបង ៖ សេចក្តីរាយការណ៍បឋមឱ្យដឹងថា រថយន្តកាមរីបាឡែនមួយគ្រឿង បានក្រឡាប់ជាច្រើនត្រឡប់ហើយជ្រុលទៅបុកខ្យូសមុខផ្ទះប្រជាពលរដ្ឋមួយកន្លែង បណ្តាលឱ្យរងការខូចខាតយ៉ាងដំណំ និងមិនអស់ចិត្ត រថយន្តបន្តទៅបុកក្មេងស្រីម្នាក់ទៀតខណៈនៅមុខផ្ទះ ។ ប៉ុន្តែសំណាងល្អ ក្នុងហេតុការណ៍នេះ គ្មានមនុស្សណាម្នាក់ ត្រូវរងគ្រោះថ្នាក់ដល់ជីវិតនោះទេ គ្រាន់តែរបួសស្រាល កើតឡើងកាលពីវេលាម៉ោង០៣ និង៤០នាទីរសៀលថ្ងៃទី១៦ ធ្នូ នេះ ស្ថិតតាមបណ្តោយផ្លូវជាតិលេខ៥៩
(ផ្លូវព្រំដែនខ្មែរ-ថៃ) ក្នុងភូមិថ្នល់បត់ ឃុំអូររំដួល ខេត្តបាត់ដំបង ។
ជំហានដំបូង គេមិនបានស្គាល់អត្តសញ្ញាណជនរងគ្រោះទាំង៣នាក់នោះទេ ក្នុងនោះ២នាក់ប្រុស-ស្រី គេសង្ស័យថា ជាប្តី-ប្រពន្ធនឹងគ្នាជិះក្នុងរថយន្តបង្ក ម៉ាកកាមរីបាឡែន ពណ៌.ស្ករ ពាក់ស្លាកលេខភ្នំពេញ 2H-0689 ។ ដោយឡែក ក្មេងស្រីរងរបួសម្នាក់ក៏មិនទាន់ស្គាល់ឈ្មោះផងដែរ ដោយពួកគេត្រូវបានបញ្ជូនទៅសង្គ្រោះបាត់អស់ ។
ស្ថិតនៅកន្លែងកើតហេតុ ត្រូវបានប្រភពឱ្យដឹងថា ដំបូងគេរថយន្តខាងលើនោះ ធ្វើដំណើរក្នុងទិសដៅពីត្បូងទៅជើង ។ លុះមកដល់ចំណុចកើតហេតុ រថយន្តបានរេចង្កូត បន្ទាប់ពីបើកគេចពីបុរសថ្មើរជើងម្នាក់សង្ស័យស្រវឹងកំពុងដើរឆ្លងថ្នល់ ទើបធ្វើឱ្យរថយន្តជ្រុលក៏មានជួបគ្រោះថ្នាក់បែបនេះតែម្តង ខណៈរថយន្តនោះកំពុងមានល្បឿនលឿនគួរសមដែរ ។
បច្ចុប្បន្ន សមត្ថកិច្ចកំពុងអន្តរាគមន៍ចាត់់ចែងស្ទូចចេញពីកន្លែងកើតហេតុ ព្រោះបានខូចខាតទាំងស្រុង និងបញ្ជូនទៅដោះស្រាយតាមច្បាប់ ។