អាកន្តូបសាកកម្លាំងគ្នាលាន់ដូចរន្ទះ តើម្ចាស់វិញបែបណាទៅ?
11/12/2017
ខេត្តស្វាយរៀង ៖ យុវជនម្នាក់រងរបួសបាក់កំភួនជើងខាងស្តាំ ដោយសារបើកបរម៉ូតូមិនប្រកាន់ស្តាំត្រូវម៉ូតូមួយគ្រឿងទៀត បុកពេញទំហឹងចំពាក់កណ្តាលម៉ូតូ លាន់ដូចរន្ទះបណ្តាលឲ្យដួលបោកទៅលើថ្នល់រងរបួសបាក់ជើងនិងបែកក្បាលសន្លប់ទាំងសងខាង ។ ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១២និង១០យប់ថ្ងៃទី១០ឈានចូលថ្ងៃទី១១ ខែឆ្នូ ឆ្នាំ២០១៧ នៅលើកំណាត់ផ្លូវជាតិលេខ ភូមិប្រសូត្រ២ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបានឲ្យដឹងថា នៅមុនពេលកើតហេតុយុវជនម្នាក់ជិះម៉ូតូសេ១២៥ ស៊េរីឆ្នាំ២០១៥ ពណ៌ខ្មៅ ស្លាកលេខ ភ្នំពេញ ១DD -៥៥២២ មិនពាក់មួកសុវត្ថិភាព បើកពីកើតទៅលិច លុះដល់ចំណុចកើតហេតុក៏រេចង្កូតទៅខាងឆ្វេងដៃ ស្របពេលនោះក៏មានម៉ូតូមួយគ្រឿងទៀត សេ១២៥ ស៊េរីឆ្នាំ២០១៧ ពណ៌ខ្មៅ ស្លាកលេខ ព្រៃវែង ១J -៨៩៨៩ (ពាក់មួកសុវត្ថិភាព)ធ្វើ ដំណើរបញ្ច្រាសទិសគ្នាពីលិចទៅកើត បានបុកគ្នាពេញទំហឹងបណ្តាលឲ្យរងរបួសទាំងសងខាងតែម្តង ។ ប្រភពបន្តទៀតថា ជនរងគ្រោះទី១- ឈ្មោះសេង ពៅ ភេទប្រុស អាយុ២៥ឆ្នាំ ជនជាតិខ្មែរ មុខរបរកសិករ មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង រងរបួសបាក់កំភូនជើងខាងស្តាំធន់ធ្ងរ សន្លប់នៅនឹងកន្លែង ។ ចំណែកភាគីខាងម៉ូតូ២០១៧ឈ្មោះភាន សំអាន ភេទប្រុស អាយុ២៧ឆ្នាំ ជនជាតិខ្មែរ មុខរបរកម្មករសំណង់ មានទីលំនៅ រាជធានីភ្នំពេញ រងរបួសបែកក្បាលធ្ងន់ធ្ងរដូចគ្នា ។
ក្រោយពីកើតហេតុជនរងគ្រោះទាំង២ ត្រូវបានសមត្ថកិច្ចយកទៅសង្គ្រោះនៅរមន្ទីរពេទ្យបង្អែកស្រុកស្វាយទាប ។ មូលហេតុអ្នកបើកបរមិនប្រកាន់ស្តាំ ចំពោះមធ្យោបាយម៉ូតូទាំង២សមត្ថកិច្ចជំនាញយកមករក្សាទុកនៅអធិការដ្ឋាននគរបាលស្រុកស្វាយទាប ហើយបានកសាងសំណុំរឿងបញ្ជូនទៅស្នងការដ្ឋាននគបាលខេត្ត ដើម្បីដោះស្រាយតាមនីតិវិធិច្បាប់ ។
