ថ្មីៗនេះមានព័ត៌មានក្នុងស្រុកមួយចំនួនបានចុះផ្សាយជាហូរហែ ជុំវិញទំនាក់ទំនងស្នេហាតារាសម្ដែង២រូប ឈួន ពន្លឺ និង សោភា ទេពី ថាអ្នកទាំងពីពេលនេះកំពុងតែមើលចិត្តថ្លើមគ្នាទៅវិញទៅមក។
តែអ្វីដែលធ្វើឲ្យមហាជនមានការភ្ញាក់ផ្អើលខ្លាំងនោះ ដំណឹងខាងនេះលេចឮ មិនបាន១ថ្ងៃផងស្រាប់តែពេលនេះ ឈួន ពន្លឺ បានឲ្យឪពុកម្ដាយទៅចូលស្ដីដណ្ដឹង សោភា ទេពី ត្រូវជាកូនស្រីលោកផ្កាយ២ក្នុងពេលឆាប់នេះហើយ បន្ទាប់ពីស្គាល់គ្នាបានរយៈពេល៦ ខែកន្លងមកនេះ។
ឈួន ពន្លឺ ថា៖"ពេលនេះចាស់ទុំទាំងសងខាង កំពុងតែជួបជជែកគ្នាចំពោះរឿង ខ្ញុំ ចូលស្ដីដណ្ដឹងអូន ទេពី នឹងត្រៀមភ្ជាប់ពាក្យក្នុងពេលឆាប់នេះហើយបង។ ក្រោយពីភ្ជាប់ពាក្យហើយ ខ្ញុំគ្មានគម្រោងរៀបការភ្លាមៗទេប្រហែល២ ទៅ៣ ឆ្នាំទៀតទើបរៀបការ"។
គួរបញ្ជាក់ថា ឈួន ពន្លឺ ចូលសិល្បៈមុនដំបូងតាមរយៈការដើរម៉ូដឲ្យទូរទស្សន៍ប៉ុស្តិ៍លេខ៩ ក្នុងឆ្នាំ២០១៦ ។ ដោយឡែកនៅឆ្នាំ ២០១៧ លោកទទួលបានពានរង្វាន់លេខ១ ផ្នែកសម្ដែងនៅ ទូរទស្សន៍អប្សរា។ ក្រោយមកលេចមុខក្នុងរឿងខ្នាតធំ "រាជបូរី Comeback“ និងថតរឿងភាគមួយចំនួនឲ្យទូរទស្សន៍ប៉ុស្តិ៍លេខ៥។
ចំណែកឯ សោភា ទេពី ជាកូនអ្នកភ្នំពេញ ចូលសិល្បៈមុនដំបូងក្នុងឆ្នាំ ២០១៤ តាមរយៈការប្រឡងចម្រៀងក្នុងកម្មវិធី "ចង់ក្លាយជាតារា" ឲ្យប៉ុស្តិ៍លេខ៥ ទទួលបានជយលាភី២។ ក្រោយពីជាប់ក្នុងកម្មវិធីនេះ ទេពី មិនបានចូលផលិតកម្មណាមួយទេគឺនាងផលិតបទចម្រៀងច្រៀងដោយខ្លួនឯង ចំពោះខ្សែភាពយន្តវិញនាងធ្លាប់សម្ដែងរឿង "កូនក្រមុំលោកមេឃុំ"៕
