(ភ្នំពេញ)៖ កិច្ចប្រជុំរដ្ឋមន្ត្រីការពារជាតិអាស៊ាន បូក លើកទី៤ ដែលមានការចូលរួមពីរដ្ឋមន្ត្រី ការពារជាតិអាស៊ានចំនួន១០ប្រទេស និង រដ្ឋមន្ត្រីការពារជាតិ ជាប្រទេសបូក ចំនួន ៨ ទៀត រួមមាន ៖ អូស្ត្រាលី ញូហ្ស៊ឺឡែន សហរដ្ឋអាមេរិក ឥណ្ឌា ចិន សហព័ន្ធរុស្សី កូរ៉េខាងត្បូង និង ជប៉ុន បានប្រព្រឹត្ដ ទៅ នៅថ្ងៃទី២៤ ខែតុលា ឆ្នាំ២០១៧ នៅប្រទេសហ្វីលីពីន ។
ក្នុងកិច្ចប្រជុំរដ្ឋមន្ត្រីការពារជាតិអាស៊ាន បូក នាពេលនោះ សម្តេចពិជ័យសេនាទៀ បាញ់ បានមានប្រសាសន៍ថា៖ តំបន់អាស៊ីប៉ាស៊ីហ្វិកពិសេស គឺតំបន់អាស៊ានមានសេដ្ឋកិច្ចកំពុងលូតលាស់ប្រកបដោយថាមវន្ដ ហើយបានក្លាយជាតួអង្គដែលមានតួនាទីកាន់តែសំខាន់ឡើងក្នុងពិភពលោក ដោយបានទាក់ទាញកិច្ចសហប្រតិបត្តិការពីប្រទេសមហាអំណាចធំៗទាំងឡាយ។ យន្ដការសហប្រតិបត្តិការក្នុងតំបន់ក្នុងវិស័យជាច្រើនត្រូវបានបង្កើតឡើង ក៏ប៉ុន្តែតំបន់នេះក៏នៅតែជួបប្រទះការគំរាមកំហែងធំៗ ចំពោះវិស័យការពារជាតិ និងសន្តិសុខផងដែរ ។ តំបន់អាស៊ានក៏បានប្រឈមមុខនឹងផលប៉ះពាល់ធ្ងន់ធ្ងរពីការគំរាមកំហែង សន្តិសុខមិនមែនប្រពៃណីជាច្រើន។សម្តេចពិជ័យសេនាទៀ បាញ់ បានបញ្ជាក់ថា៖ កម្ពុជាត្រូវតែបន្តការពារសន្តិភាព និងការអភិវឌ្ឍន៍ឱ្យបានខ្លាំងក្លា។ កម្ពុជាត្រូវតែប្រឆាំងយ៉ាងដាច់ខាតចំពោះបដិវត្តពណ៌ និងមិនត្រូវអនុញ្ញាតឱ្យវាកើតឡើងបានជាដាច់ខាតក្នុងទឹកដីកម្ពុជា។ សន្តិភាព និងស្ថិរភាពនៅកម្ពុជា ក៏ដូចជាសន្តិភាព និងស្ថិរភាពរបស់ប្រទេសទាំងអស់នៅក្នុងតំបន់ គឺមានទំនាក់ទំនងគ្នាយ៉ាងជិតស្និទ្ធ ហើយបើប្រទេសនីមួយៗគ្មានសន្តិភាព និងស្ថិរភាព នោះតំបន់ក៏គ្មានសន្តិភាព និងស្ថិរភាពដែរ។ សម្តេចពិជ័យសេនា ទៀ បាញ់ បានបន្ថែមថា ៖ សម្រាប់កម្ពុជា សន្តិភាព និងស្ថិរភាព គឺមានតម្លៃណាស់។ បន្ទាប់ ពីមានសន្តិភាពពេញលេញនៅឆ្នាំ១៩៩៨មក កម្ពុជា មានមោទនភាពណាស់ចំពោះភាពប្តេជ្ញាចិត្តឥតងាករេរបស់ខ្លួន សម្រាប់ចូលរួមភារកិច្ចប្រតិបត្តិការថែរក្សាសន្តិភាពរបស់អង្គការសហប្រជាជាតិ។ ចាប់តាំងពីឆ្នាំ២០០៦ កម្ពុជាបានបញ្ជូនកងទ័ពចំនួនប្រមាណ ៤,៧០០នាក់ ឱ្យចូលរួមយ៉ាងជោគជ័យ និងគួរឱ្យកោតសរសើរ ។
សម្តេចពិជ័យសេនា បានសង្កត់ធ្ងន់ថា៖ រាជរដ្ឋាភិបាលកម្ពុជានៅតែបន្តការប្តេជ្ញាចិត្តរបស់ខ្លួន ក្នុងការបញ្ជូនកងកម្លាំងថែរក្សាសន្តិភាពរបស់ខ្លួន ទៅបម្រើបេសកកម្មថែរក្សាសន្តិភាពរបស់អង្គការសហប្រជាជាតិ ដើម្បីបង្ហាញអំពីឆន្ទៈរបស់យើងក្នុងការកសាងសន្តិភាពសម្រាប់មនុស្សជាតិ។ ឆ្លៀតក្នុងឱកាសនោះ សម្តេចពិជ័យសេនាក៏បាន ថ្លែងអំណរគុណដល់កងកម្លាំងរបស់ប្រទេសជាមិត្តទាំងឡាយ ដែលចូលរួមនៅក្នុងបេសកកម្មរបស់ អង្គការសហប្រជាជាតិ ដែលបានជួយគាំទ្រឥតឈប់ឈររបស់ពួកគេ មកកាន់កងកម្លាំងរបស់កម្ពុជាដែលធ្វើប្រតិបត្តិការ ដើម្បីធានាឱ្យបាននូវការសម្រេចគោលដៅដែលចង់បាន។
នៅក្នុងកិច្ចប្រជុំរដ្ឋមន្ត្រីការពារជាតិអាស៊ាន បូក ( ADMM-Plus ) នោះរដ្ឋមន្ត្រីការពារជាតិអាស៊ាន និង រដ្ឋមន្ត្រីការពារជាតិមកពីប្រទេសបូក បានធ្វើការផ្លាស់ប្តូរទស្សនៈគ្នា ទៅវិញទៅមកដែលទាក់ទងទៅនឹងបញ្ហាសន្តិសុខ ភេរវកម្ម សង្គ្រោះគ្រោះមហន្តរាយ បញ្ហាប្រឈមនានា រួមទាំងបញ្ហានុយក្លេអ៊ែ កូរ៉េខាងជើងផងដែល ។
កិច្ចប្រជុំរដ្ឋមន្ត្រីការពារជាតិអាស៊ាន បូក គឺជានិម្មាបនកម្ម ដ៏សំខាន់សំរាប់តំបន់ ព្រោះអាស៊ានបានផ្តល់សុខដុមនីកម្មក្នុងដំបន់ ហើយក្នុងនោះកងទ័ពបានដើរតួនាទីយ៉ាងសំខាន់ក្នុងការដោះស្រាយបញ្ហាសន្តិសុខ ។ ទន្ទឹម នេះ អាស៊ានក៏ជាវេទិកាមួយជំរុញអោយមានកិច្ចសហប្រតិបត្តិការក្នុងតំបន់ និង ជំរុញអោយមានការវិវត្តថ្មីៗក្នុងតំបន់ ៕