បាល់ទាត់៖ ក្រុមម្ចាស់ផ្ទះចិនត្រូវបានចាប់ឆ្នោតចូលក្នុងពូលជាមួយកាតា ខណៈក្រុមការពារតំណែងជើងឯកជប៉ុន ត្រូវស្ថិតក្នុងពូលជាមួយក្រុមចំណូលថ្មីប៉ាឡេស្ទីន បន្ទាប់ពីការចាប់ឆ្នោតបែងចែកពូលម្សិលម៉ិញ នៃព្រឹត្តិការណ៍បាល់ទាត់ជើងឯកយុវជនអាយុក្រោយ 23 អាស៊ី 2018។
ពិធីចាប់ឆ្នោតម្សិលម៉ិញធ្វើឡើងនៅទីក្រុង Changzhou ខេត្ត Jiangsu ប្រទេសចិន ដោយក្រុមបាល់ទាត់ទាំង 16 ឆ្លងកាត់វគ្គជំរុះត្រូវប្រកួតវិលជុំសន្សំពិន្ទុចែកចេញជាបួនពូល។ ក្រុមម្ចាស់ផ្ទះចិនស្ថិតក្នុងពូល A ជាមួយកាតា, អ៊ុយប៊ែគីស្ថាន និងអូម៉ង់ ស្របពេលដែលក្រុមដែលទើបមានវត្តមានលើកដំបូង ប៉ាឡេស្ទីនត្រូវធ្វើការងារធ្ងន់ដោយជួបក្រុមជើងឯកចាស់ជប៉ុន រួមជាមួយកូរ៉េខាងជើង និងថៃក្នុងពូល B។
ក្រុមចំណូលថ្មីមួយទៀតម៉ាឡេស៊ីស្ថិតក្នុងពូល C ដែលសំបូរដោយក្រុមខ្លាំងរួមមានអ៊ីរ៉ាក់, ហ្សកដានី និងអារ៉ាប៊ីសាអ៊ូឌីត ខណៈពូល D កូរ៉េខាងត្បូងត្រូវជួបអូស្ត្រាលី, វៀតណាម និងស៊ីរី។ ព្រឹត្តិការណ៍បាល់ទាត់ AFC U23 Championship នឹងចាប់ផ្ដើមនៅខែមករាដើមឆ្នាំក្រោយ នៅទីក្រុងចំនួនបួនក្នុងខេត្ត Jiangsu ប្រទេសចិនរួមមាន Changzhou, Kunshan, Jiangyin និង Changshu៕
