បើយោងតាមរដ្ឋមន្ត្រីក្រសួងកីឡារបស់តំបន់ Catalan លោក Gerard Figueras ក្នុងថ្ងៃនេះបានថ្លែងថា ក្លឹបបាល់ទាត់ក្នុងទឹកដីមួយនេះ ដែលក្នុងនោះមានទាំងក្លឹបអ្នកមានបុណ្យ Barcelona ផង អាចនឹងលេងក្នុងលីគកំពូលអង់គ្លេស បើសិនជាតំបន់ Catalan នឹងបែកចេញពីប្រទេសអេស្ប៉ាញមែន។
លោករដ្ឋមន្ត្រីរូបនេះ បាននិយាយថា៖ "បើសិនជា Catalan ទទួលបានឯករាជ្យមែន ក្លឹបទាំងអស់ដែលកំពុងលេងក្នុងលីគកំពូលអេស្ប៉ាញ ដូចជា Barcelona, Espanyol និង Girona នឹងត្រូវសម្រេចថាតើពួកគេនឹងលេងក្នុងលីគណាផ្សេងទៀត នៅក្នុងលីគកំពូលអេស្ប៉ាញដដែល ឬ Premier League, Ligue 1 or Serie A "។
លោក Figueras បានបន្តទៀតថា៖ "ឥឡូវនៅអេស្ប៉ាញ ក៏មានក្លឹបមកពីប្រទេសផ្សេងមកលេងក្នុងលីគរបស់ប្រទេសមួយនេះដែរ ដូចជាក្លឹបបាល់ទាត់ និងបាល់បោះមកពីប្រទេស Andorra។ ចំណែកឯក្លឹបមកពីប្រទេស Monaco កំពុងលេងក្នុងលីគកំពូលបារាំង ខណៈនៅក្នុងលីគបាល់ទាត់អង់គ្លេស ក៏មានវត្តមានក្លឹបមកពីប្រទេសវេលផងដែរ។ ដូច្នេះខ្ញុំមិនគិតថា UEFA ជំទាស់រឿងហ្នឹងទេ"។
ការថ្លែងរបស់រដ្ឋមន្ត្រីរូបនេះ ធ្វើឡើងខណៈពេលដែល ការបោះឆ្នោតប្រជាមតិរបស់តំបន់ Catalan នឹងធ្វើឡើងនៅថ្ងៃអាទិត្យខាងមុខនេះ ដើម្បីទាមទារឯករាជ្យ ផ្ដាច់ចេញពីការគ្រប់គ្រងរបស់ប្រទេសអេស្ប៉ាញ។ កន្លងមក ប្រធានលីគកំពូលអេស្ប៉ាញ លោក Javier Tebas បាននិយាយក្នុងន័យថា បើសិនជាក្នុងទឹកដី Catalan បានឯករាជ្យមែន ក្លឹបបាល់ទាត់ក្នុងទឹកដីនេះ (ដែលមានទាំងក្លឹបអ្នកមានបុណ្យ Barcelona ផង) នឹងមិនអាចបន្តលេងក្នុងលីគកំពូលអេស្ប៉ាញទៀតនោះឡើយ៕
ប្រភព៖ Goal
![logoblog](https://3.bp.blogspot.com/-h2g5wrjCTDw/Wz3E6ocavYI/AAAAAAAABH8/nOqtyDL2VnEF_HmhZyjlu59zWRS8t7ZNwCLcBGAs/s1600/blogger.png)