សេវាកម្មស្ដាប់ចម្រៀងតាមអ៊ីនធឺណិតដូចជា Apple Music ឬ Spotify បន្តជួយរកចំណូលឲ្យឧស្សាហកម្មចម្រៀងរបស់សហរដ្ឋអាមេរិកបានខ្ទង់ពាន់លានដុល្លារ។
តាមរយៈរបាយការណ៍បញ្ចេញដោយសហគមន៍ឧស្សាហកម្មចម្រៀងអាមេរិក (RIAA) បានបង្ហាញថាចំណូលពីការលក់រាយចម្រៀងក្នុងពេល ៦ ខែដំបូងនាឆ្នាំ ២០១៧ កើនឡើង ១៧ ភាគរយធៀបនឹងឆ្នាំមុន ដោយរកបាន ៤ ពាន់លានដុល្លារ។ ស្របពេលដែលការលក់ដុំកើនឡើង ១៥ ភាគរយ ដោយរកបាន ២,៧ ពាន់លានដុល្លារ។
ចំណូលទាំងនេះមាន ៦២% បានមកពីសេវាកម្មស្ដាប់ចម្រៀងតាមអ៊ីនធឺណិត, ១៩ % បានមកពីការដោនឡូដ និង ១៦% បានមកពីការលក់ចម្រៀង។ ធៀបនឹងឆ្នាំ ២០១៥ សេវាកម្មស្ដាប់ចម្រៀងតាមអ៊ីនធឺណិតរកបាន ៣៣% នៃចំណូលសរុប, ការដោនឡូដរកបាន ៤១% និង ការលក់រកបាន ១៦%។ តាមទិន្នន័យនេះបង្ហាញឲ្យឃើញថាយុគសម័យអ៊ីនធឺណិតនេះ មនុស្សចូលចិត្តចំណាយលុយលើការស្ដាប់ចម្រៀងតាមអ៊ីនធឺណិត ជាជាងការទិញ ឬ ដោនឡូដចម្រៀងទាំងនោះមកស្ដាប់៕
ប្រភព៖ 9to5Mac